BUTUAN CITY – Padayon ang gihimong coordination meeting sa mga tag-as nga opisyal sa kapulisan ning siyudad sa Butuan uban kang Police Regional Office kon PRO-13 director Brigadier General Gilberto DC Cruz subay na sa gimugnang Special Investigation Task Group kon SITG.
Kini subay na sa tinguhang ma-ilhan na aron mapanubag ang gibana-banang 15 ka mga armadong kalalakin-ang nagpa-ilang mga sakop sa CIDG-Davao og nanulis sa pinuy-anan sa negosyanteng si Romulo Pal.
Sa eksklusibong pakighinabi sa Bombo Radyo Butuan, gipadayag ni BCPO spokesman PCaptain Emmerson Alipit nga padayon silang nakadawat og mga mahinungdanong impormasyon nga gila-umang makaatabang pagsulbad sa maong hitabo.
Mihangyo pa si Captain Alipit ngadto sa publiko nga dili una hukman nga apil ang pipila ka mga sakop sa CIDG-Caraga sa mihimo sa gipatu-ong raid human matud pa nakita ang pipila kanila diha sa CCTV footage.
Padayon matud pa ang ilang imbestigasyon kondiin mi-abag niini ang mga membro og opisyal sa nasangpit nga ahensya.
Gidetermina na usab sa Special Investigation Task Group kon SITG kung organized crime group ba o dili ang amga armadong lalaking pugsanong mironda sa pinuy-anan sa negosyanten kondiin apil sa ilang sutaon ang indibidwal nga nagpundo sa maong raiding team tungod sa gigamit nilang mga high-powered firearms ug mga sakyanang.
Gidugang pa ni Captain Alipit nga gitagsa-tagsa na pagsusi sa SITG mga detalyeng nakita sa CCTV footage kondiin kini ang hinungdan nga wala nila gidali-dali pagtapos ang imbestigasyon aron masigurong dili masayang ang mga ebidensyang makita unya nila sa footage.
