BUTUAN CITY – Nagpahigayon karun ug follow-up nga imbestigasyon ang kapulisan sa Madrid, Surigao del Sur mahitungod sa pagpanunog sa 5 ka mga ekwepo nga gigamit sa gihimung exploration sa bukirang parte sa Sitio Nakatindog, sa Barangay Bayugo sakop sa maong lungsod kagahapon sa kaadlawon.
Sa pakighinabi ning sibyahan kang Police Lt. Hildo Ruasa, Hepe sa Madrid Municipal Police Station, miresponde sila sa tawag nga dunay 4 ka drilling machine nag gianag-iyahan sa First Highlander Mining Corporation nga nagpahigayon ug exploration sa maong dapit, nga gisunog sa armadong grupo. Ug didto nakita ang mga ekwepo nga dili na magamit pa human na-ugdaw.
Gibana-banang muabot sa halos 4 milyones pesos ang kantidad sa 4 ka drilling machine.
Samtang pipila ka oras ang milabay sa lahi nga bukid apan sakop gihapon sa susamang barangay, gidabdaban usab ang usa ka backhoe nga naghimu ug dalan sa maong dapit mga alas 12:30 sa udtu. Miabot sa 7 milyones pesos ang kantidad sa maong backhoe.
Sa gihimung pagpanubay, gi-asuy sa nakasaksi nga operator nga gibana-banang 50 ka armadong kalalakin-an nga gitoohang miyembro sa New People’s Army kon NPA.
Nagbilin pa kini og mga pulong nga gisugo lang sila sa ilang labaw.
Sumala pa sa Hepe nga dunay nakuhang impormasyon gikan sa katawhan nga wala matud pa mihatag ug revolutionary tax nga maoy gitoohang hinungdan sa pagpanunog.
Sa karun, nagpadayon usab ang hot pursuit operation sa kasundaluhan batuk sa mga responsable.
