BUTUAN CITY – Mi-abot na sa 18 ka mga tawo ang patay gumikan sa sakit nga measles kon tipdas dinhi sa Caraga region, base sa pinaka-ulahing datus sa Center for Health Development kon CHD-Caraga Region.
Sigon ni CHD-Caraga OIC-Assistant Regional Director Gerna Manatad, sa maong gidaghanon, 16 ang naggikan sa Agusan del Sur og kasagaran sa mga namatay, mga batang malnourished kinsa wala ma-immunize o matupuki og measles vaccine.
Pipila usab ka mga lumad sa border area sa maong lalawigan ang nataptan niini.
Sigon ni Dr. Manatad, wala mabakunahi sa mga health workers ang mga namatay tungod kay dili sila permanenteng mga residente sa lugar gawas nga lisud pang adtuan sa mga health workers ang layo og hilit nilang lugar nga duna’y risgo sa seguridad.
Gawas sa Agusan del Sur, mitala usab ug tag-usa ka patay ang Surigao City ug Agusan del Norte.
Sa kinatibuk-an, ang Caraga region duna na’y 1,150 ka kaso sa measles karong tuiga kontra sa 151 ng natala ning nakalabayng tuig.
Kadaghanan sa kaso natala sa Agusan del Sur nga duna’y 332 nga gisundan sa Surigao City-289 ug ikatulo ang Surigao del Norte nga adunay 145 ka kaso.
Sa Surigao del Sur, 106 katao ang nagka-measles samtang ikalima sa listahan ang Butuan City nga duna’y 108 ka mga kaso.
