BUTUAN CITY – Gireklamo sa retiradong local journalist nga si Salvador ‘Bads’ Cupin ngadto sa Ombudsman og paglapas sa Anti-Graft and Corrupt Practices Act ang mga kasamtangang opisyal sa lokal nga kagamhanan ning siyudad sa Butuan.
May kalabutan kini sa ila matud pang pag-abandona sa 253-milyunes pesos nga balor sa Butuan Polysports Complex nga nahimutang sa Brgy. Tiniwisan kansa gipatuman sa JD Legaspi Construction nga nakabase sa Metro Manila.
Apil sa mga gikasuhan sila Mayor Ronnie Vicente Lagnada, Vice Mayor Jose ‘Joeboy’ Aquino II ingon man sila Konsehal Omar Andaya, Rema Burdeos, Cherry Mae Busa, Glen Carampatana, Ferdinand Nalcot, Cromwell Nortega, Derrick Plaza, Vincent Rizal Rosario, Ernest John Sanchez, og John Gil Unay.
Base sa reklamo ni Cupin, nagkunsabo matud pa ang kasamtangang mga city officials pag-abandona sa maong proyekto taliwa nga padayong gibayran ang loan amortizations niini gamit ang pundo ning siyudad.
Nakalatid pa sa reklamo nga makita sa mismong sports complex ang kawala matud pa’y maintenance activities niini rason sa pagkaguba na sa mga physical structures niini.
Klaro matud pa nga tumong sa pag-abandona sa maong proyekto ang pagpaka-ulaw kang kanhi Butuan City Mayor Ferdinand Amante Jr. human nga gi-award sa kanhi mayor ang maong proyekto ngadto sa JD Legazpi Construction.
Dinhi matud pa nagsugod ang dili na maayong relasyon sa duha taliwa sa ilang kasuod nga managhigala atol sa unang termino ni Amante kondiin niadtong higayuna, ang Equi-Parco Construction Company sa kasamtangang mayor, maoy nakakuha sa halos tanang proyekto sa city government sama na lamang sa landfill area project og sa Tabuan market project nga nagkantidad og sien-milyunes pesos matag-usa.
Gipangayo ni Cupin nga higayong duna’y makitang probable cause batuk sa tanang mga respondents nga mga city officials sa pagpanguna ni Mayor Ronnie Vicente Lagnada alang sa paglapas sa Section 3 sa Republic Act No. 3019 kon mas nailang Anti-Graft and Corrupt Practices Act, imando matud pa sa Ombudsman ang pag-file sa maong impormasyon ngadto sa tukmang korte.
Samtang sa administrative aspect, higayong makita nga ang tanang mga respondents nakakumitar og grave misconduct ingon man o kaha willful dereliction of duties, kinahanglang imando matud pa ang preventive suspension batuk kanila og dismissal from the service uban sa perpetual disqualification sa pagpahupot nila og posisyon sa gobyerno. (Beth Ruiz)
