BUTUAN CITY- Misaka na sa siyam ang namatay tungod sa Leptospirosis sa Quezon City gikan Enero 1 hangtod Hunyo 18, 2026, sumala sa pinakabag-ong datos sa Quezon City Epidemiology and Surveillance Division.
Nakarehistro usab ang siyudad og 66 ka kaso sa maong sakit, diin kadaghanan sa mga nataptan adunay edad 31 anyos pataas ug kasagaran mga lalaki. Sigon sa Department of Health, kasagarang mosaka ang kaso sa leptospirosis panahon sa ting-ulan tungod kini mahimong motakod pinaagi sa ihi sa mga mananap sama sa ilaga, baka, baboy ug iro nga masagol sa baha, sapa o kanal.
Gidasig sa mga awtoridad ang publiko nga likayan ang paglusong sa baha ug mogamit og proteksiyon sama sa botas ug gwantes kon kinahanglan moagi sa gibahaan nga lugar. Alang sa mga minglusong na sa baha, girekomendar ang dayong pagkonsulta sa pinakaduol nga health center aron mahatagan og hustong tambal, lakip ang Doxycycline nga gigamit isip panalipod batok sa leptospirosis.
