BUTUAN CITY – Nag-trending karon si Yingzi, usa ka 74-anyos nga babaye sa China nga adunay kapin 2 milyon ka followers sa social media, tungod sa iyang batan-ong kaayo nga hitsura ug estilo sa kinabuhi.
Naga-post siya og mga video nga nagsayaw sa kalsada nga naka-high heels ug nagpa-pose, mao nga daghan ang na-inspire kaniya tungod sa iyang confidence ug positive nga pamatasan.
Matud niya, ang edad numero lang, ug ang importante, batan-on ang huna-huna ug pagsalig sa kaugalingon. Iyang gipasigarbo ang disiplinado nga lifestyle kondiin dili siya mokaon human sa alas-singko sa hapon, permi siya mokaon og healthy food sama sa gulay, sabaw, ug protina, ug naga-yoga siya kada buntag.
Sa iyang kabatan-on, interesado na siya sa fashion ug beauty kondiin nagtrabaho siya kaniadto sa Japan, ug duna’y kaugalingong Chinese restaurant hangtud nga mibalik siya sa China.
Niadtong 2022, sa edad nga 70-anyos, mi-apil siya sa fashion group nga “Beijing Fashion Grandmas,” ug nakasuway pa siya og runway modeling sa Shanghai Disneyland.
Ang iyang mensahe, dili babag ang edad sa pagtan-aw og tarong sa kinabuhi—kondili oportunidad pa gani kini nga magpabiling aktibo ug masayud sa kaugalingon.
