BUTUAN CITY- Aron masiguro ang malinawon, hapsay ug malampusong 2026 Palarong Pambansa sa Agusan del Sur karong Mayo 24 hangtod 31, gipahigayon sa Police Regional Office (PRO) 13 ang Simultaneous Send-Off Ceremony sa 700 ka security personnel uban sa logistical support kaganihang buntag Lunes, Abril 27.
Gipangulohan ni Police Brigadier General Marcial Mariano Magistrado IV, ang deployment nga naglakip sa 50 ka pulis gikan sa Agusan del Norte, 30 sa Butuan City, 50 sa Surigao del Norte ug 50 sa Surigao del Sur Police Provincial Office,120 ka personnel sa Regional Mobile Force Battalion 13, samtang 400 ka trainees sa Basic Internal Security Operations Course ang gi-augment aron masiguro ang operational readiness.
Gidugang usab ang specialized units sama sa Special Weapons and Tactics kon SWAT, tactical teams, medical nga adunay 2 ka ambulance sa Regional Medical and Dental Unit 13 ug engineering support, ug Explosive Ordnance Disposal teams. Gipangulohan usab sa pari ang pagbendisyon sa mga tawo ug kagamitan, nga simbolo sa espiritwal ug operasyonal nga pag-andam.
Gipasalig ni Magistrado nga adunay “zero tolerance” sa krimen ug guba sa kalinaw, ug gidasig ang tanang personnel nga magpabilin nga disiplinado ug magtinabangay sa ubang ahensya aron maprotektahan ang kaluwasan sa liboan ka atleta, delegado ug manan-aw sa Caraga.
