BUTUAN CITY – Paningkamutan sa mga bag-ong opisyal sa Diamond Transport Service Cooperative kon DATSCO nga makuha na nila karong semanaha ang certificate of compliance kon COC nga maoy kiinahanglanon sa Land Transportation, Franchising and Regulatory Board kon LTFRB-Caraga aron maproseso na ang ilang provisional authority sa ingon maka-renew sila sa ilang prangkisa.
Kini human nga wala pa gihapon mu-aginod ang mga dokumentong gikinahanglan pila ka semana human ang ilang pinaka-unang malampusong general assembly.
Sa ekskilusibong pakighinabi sa Bombo Radyo Butuan, gipadayag Romeo Ednilan, usa sa mga bag-ong board of directors sa DATSCO, nga nakurat sila dihang sa pagdalikyat nila sa buhatan sa Cooperative Development Authority kon CDA-Caraga niadtong Lunes aron mangayo og certificate of compliance kon COC, gibalibaran sila sa rasong duna matud pa’y motion for reconsideration nga giduso ang mga kanhi opisyal sa maong kooperatiba pagpanguna sa nagpabilin pa nilang chairman nga si Evans Lawenko.
Maghulat matud pa ang maong buhatan sa desisyong ipagawas sa CDA-Central Office kalabot sa nasangpit nga mosyon ilabina sa eskedyol sa hearing nga gila-uman nilang matapos sa usa lang ka adlaw.
Gikwestyon pa ni Ednilan ang kawala’y kakapas sa CDA-Caraga nga magtakda og hearing ilabina nga sila mismo ang nagpasalig kanila nga dili na ilhon ang grupo ni Lawenko human nga gisibog na usab niini ang katapusang gihatag kanilang lugway alang sa ikalima nang gitakdang general assembly.
Nasayrang tungod sa mosyong giduso sa grupo ni Lawenko, wala pa sila makalingkod sa ilang pwesto apan magmosyon usab sila aron tagalan og 72-oras ang ilang mga kanhi opisyal sa ingon i-turn over na kanila ang mga sakyanan ug mga dokumento sa ingon dili sila mapugos paghimo og mga legal nga lakang batuk kanila.
Gipasalig niya sa tanang mga membro nga makuha na nila ang COC karong semanaha aron makadagan na og balik ang ilang mga yunit karong bulana.
Madumdumang mi-expire na ang ilang provisional authority niadto pang Hunyo ning tuiga human nga wala mu-comply ang ilang mga opisyal sa mga rekisitos aron unta makakuha sila og Certificate of Good Standing kon CGS gikan sa Office of Transportation Commission kon OTC alang sa pag-apply nila og renewal sa ilang prangkisa.
