BUTUAN CITY – Kampante ang lokal nga kagamhanan ning siyudad sa Butuan nga ila nang makab-ot karong adlawa ang gitagana kanilang inadlaw nga target nga 15-mil ka mga indibdiwal nga bakunahan subay sa tulo ka adlaw nga National Vaccination Days nga gisugdan kagahapon.
Kini human nga wala makab-ot sa unang adlaw kagahapon ang maong target human nga mi-abot lang sa kapin 10-mil ka mga indibidwal ang nabakunahan apil na niini ang second dose.
Sigon ni Butuan City spokesperson Michiko de Jesus, mi-abag sa city government ang mga barangay officials pag-awhag sa katawhan nga magpatupok sa bisan asang vaccination sites apil na sa mga mu-avail sa mobile vaccination sa pipila ka mga barangay ning siyudad.
Higayong makuha nila ang 45-mil nga mabakunahang indibidwal sa tulo ka adlaw nga Bayanihan, Bakunahan, hayag na nga makb-ot ang 70-porsientong herd immunity ning siyudad.
Ang tanan matud pang naglinya kagahapon, gipangbakunahan aron mu-uli nga dili dismayado rason nga wala sila’y gitakdang oras sa pagtapos niini tungod kay agdon man ang pagkahurot na sa mga maglinyang indibidwal.
