BUTUAN CITY – Mu-abot sa 40 ka mga mananagat ning siyudad sa Butuan ang makadawat og mga bag-ong fiberglass nga sakayang pandagat isip unang batch sa programa sa City Agriculture and Veterinary Department kon CAVD nga “Baoto Ko Hinang Ko”.
Himuon ang turn-over ceremony alang sa maong mga baruto ugmang adlawa Lunes, Hulyo 27.
Nasayrang ilalom sa maong programa, gitudluan ang mga mangingisda sa dakbayan sa paghimo o pagpanday sa ilang kaugalingong fiberglass nga baroto nga gila-umang makatabang sa ilang panginabuhian ingon man, mapadayon ang boat-making sa siyudad. Tumong usab niini nga makakat-on sila paghimo sa maong klase sa baruto kondiin libre ang mga materyales.
Sigon sa instructor nga si Jemuel Madelo, mas lig-on ang fiberglass nga baruto kung itandi sa kahoy tungod kay molungtad kini og hangtud 30 ka tuig. Mahimo usab kining tauran og makina, ug mas daghanpa ang makarga.
