BUTUAN CITY- Upat ka mga suspek ang nadakpan samtang nagpatuman ang Criminal Investigation and Detection Group (CIDG), kauban ang Mines and Geosciences Bureau (MGB) ug Surigao City Police Station, og anti-illegal mining operation sa Sitio Bedrock, Barangay Mabini, Surigao City niadtong Hulyo 23.
Nasakmit sa mga otoridad ang duha ka backhoe, walo ka sako sa gituohang bulawanong ore, mga kagamitan sa pagmina ug uban pang ekipo nga gibanabanaang nagkantidad og P9.5 milyon.
Sumala sa CIDG, wala’y legal nga permit gikan sa MGB ang mga gidakop ug pakyas usab ang mga niini nga makapakita og mga dokumento nga nagtugot sa ilang pagmimina ug pagproseso sa mineral.
Gipasiugda sa CIDG nga padayon nilang palig-onon ang kampanya batok sa ilegal nga pagmina ubos sa OPLAN Kalikasan, aron mapanalipdan ang kinaiyahan ug mapugngan ang dugayng kadaot sa mga natural nga kahinguhaan sa nasud.
