BUTUAN CITY – Bisan og mikunhod ang bag-ong kaso sa COVID-19 dinhi sa Caraga Region karong adlawa kumpara kagahapon, apan naka-abot gihapon kini sa kapin 200 human nga mi-abot sa 261 ang mga bag-ong kaso samtang 4 usab ang patay.
Sa pinaka-ulahing situational report sa Department of Health kon DOH-Caraga, ang 261 ka mga bag-ong kaso pulos naka-isolate samtang nakatala usab sila og 91 ka mga bag-ong nakarekober.
Tungod niini, nakatala na ang rehiyon og 13,993 ka cumulative COVID-19 cases kondiin 2,659 ang naka-isolate; 10,901 ang hingpit nang nakarekober ug 433 na ang kinatibuk-ang patay.
Pinakadaghang nakatala og mga bag-ong kaso ang dakbayan sa Butuan nga mi-abot sa 82 nga gisundan sa Surigao del Sur-44; Agusan del Norte-38; Bislig City-28; Agusan del Sur-27; samtang 14 sa Surigao del Norte; 10 sa Bayugan City; 6 sa Surigfao City; 3 sa Tandag City, 2 sa Cabadbaran City ug 1 sa Dinagat Islands province.
