BUTUAN CITY – Wala’y natalang patay karong adlawa may kalabutan sa COVID-19 ang Department of Health kon DOH-Caraga apan duna’y 32 ka mga bag-ong kaso nga pulos naka-isolate.
Sa pinaka-ulahing virtual situational report sa maong ahensya, nasuta nga sa maong ihap, 21 niini ang mga babaye samtang 11 ang mga lalaki ug 56-porsiento ang anaa sa edad nga 11 ngadto sa 40-anyos.
Ang mga bag-ong kaso na-apod sa 5 ka mga kaso sa Buenavista, Agusan del Norte samtang 3 lang sa Agusan del Sur nga na-apod sa mga lungsod sa San Luis, Sta Josefa ug Talacogon.
Nakatala usab og usa ka kaso sa Brgy. Washington, Surigao City; tag-2 ka kaso usab sa Hinatuan, Surigao del Sur ug Tandag City ug 12 ka mga kaso sa Bislig City nga na-apod sa Brgy. Mangagoy-7, San Jose-2 ug tag-usa na sa Brgy. Comawas, Poblacion ug Tabon.
Samtang 7 ka mga bag-ong kaso ang nadugang sa Butuan nga gilangkuban sa 5 ka kaso sa Brgy. JP Rizal ug tag-usa sa Bonbon ug Dagohoy.
Tungod niini, ang Caraga Region, duna na’y 7,145 ka cumulative COVID-19 cases kondiin 866 niini ang mga aktibo; 5,991 ang mga nakarekober ug nalansang pa sa 288 ang patay.
