BUTUAN CITY – Tulo ka motorista ang angol sa vehicular accident nga gilangkuban sa duha ka motorsiklo ug usa ka motorized trisicad pasado alas-sais ning buntaga lang sa gawas nga bahin sa Bombo Broadcast Center sa national highway sa Purok 6, Brgy. Ampayon ning siyudad sa Butuan.
Naila ang mga na-angol nga sila Cervantes Baldegonza, 26-anyos, ulitawo ug ang manghod niining si Jamil Villanueva, pulos residente sa Brgy. Colorado, Butuan City kinsa sakay sa usa ka motorsiklo ug ang sakay usab sa l.ain pang motorsiklo nga si Nelven Guibao, 26-anyos, residente sa Purok 1, Brgy. Sumilijon ning siyudad.
Base sa inisyal nga imbestigasyon, padulong unta sa sentrong bahin ning siyudad si Baldegonza aron mutrabaho samtang angkas ang iyang manghod dihang kalit lang mitabok ang motorized trisicad hinungdan nga milapot ang motorsiklo pabalik sa agi diin mi-igo usab kini sa nagsunod nga motorsiklong gimanehuan ni Guibao.
Parehong gidala ang mga biktima sa Butuan Medical Center samtang ang driver sa motorsicad, padayon pang gipanubayan sa kapulisan.
