BUTUAN CITY – Posibleng hukman og tibuok kinabuhing pagkabilanggo ang usa ka lalaking manambalay sa Uganda human nakuhaan og 24 ka mga kalabera sa tawo kansa posibleng iyang gigamit sa human sacrifice.
Sigon ni Police spokesperson Patrick Onyango, ang suspetsadong si Ddamulira Godfrey, kasuhan ilalom sa Prevention and Prohibition of Human Sacrifice Act.
Duna usa’y napalgang mga kalabera ug panit sa mananap sa shrine ni Godfrey sa suburbs sa capital Kampala.
Gi-angkon ni Godfrey nga usa siya ka albularyo ug herbalist apan wala siya girekognisa sa Traditional Healers’ Association sa maong nasud.
Dili kini ang unang higayon nga duna’y makalilisang nga discovery nga ingon niini tungod kay ning mi-aging buwan, narekober sa kapulisan ang 17 ka mga kalabera sa tawo sa usa ka shrine gihapon sa central district sa Mpigi, kansa 41-kilometros ang gilay-on gikan sa Kampala.
Ang duha ka mga discoveries gikutay ngadto sa human sacrifice alang sa katuyuang ritwal kondiin kadaghanan sa mga nasud sa Africa, mutuo sa mga magic charms nga gama gikan sa parte sa lawas sa tawo tungod kay mao matud pa kini ang magdala kanila og swerte sama sa paghimo kanilang adunahan o kaha pangtunglo sa ilang mga kaaway.
