BUTUAN CITY – Mi-abot na sa 213 ka mga pulis nga sakop sa Butuan CIty Police Office ang apektado na sa COVID-19 sukad nahimong mga frontliners atol sa kampanya sa lokal nga kagamhanan ning siyudad batuk sa maong sakit.
Sa eksklusibong pakighinabi sa Bombo Radyo Butuan, gikumpirma ni Butuan City Police Director Col. Canelo Fuentes nga ang maong mga pulis nagpositibo sa rapid test apan sa swab test, mi-abot lang sa 39 ang nagpositibo sa makamatay nga sakit.
Hinuon ubay-ubay na sa maong ihap ang nakarekober na human mipa-ilalom sa 17 ka adlaw nga istriktong quarantine.
Bisan pa man og nadugangan ang ilang trabaho, komitido silang doblehon ang ilang trabaho aron protektahan ang katawhan ning siyudad sa ingon malikay sila nga mataptan sa coronavirus.
