BUTUAN CITY – Pinangunahan mismo ni Philippine National Police (PNP) Chief Director General Archie Francisco Gamboa ang pagpa-atubang sa media nila KAPA founder Joel Apolinario, iyang asawang si Reyna ug laing 24 nila ka mga sakop kaganinang buntag.
Gihimo kini sa may Camp Rafael Rodriguez sa Brgy. Libertad ning siyudad sa Butuan, usa ka adlaw human ang malampusong operasyon sa gitaguang resort sa mga Apolinario sa Sitio Dahican nga boundary sa Brgy. Handayaman ug Salvacion sa lungsod sa Lingig, Surigao del Sur.
Sigon ni Gen. Gamboa, hatagan niya og reward ug promosyon ang 200 ka mga pulis nga ka-uban sa operasyon higayong madawat na niya ang operations report sa Police Regional Office (PRO) 13 diin makita ang mga pangalan ug yunit nga gilangkuban sa nalambigit nga mga pulis.
Apil sa gipresenta ang nagkada-iyang klase sa mga armas, mga bala ug uban pang mga war materials nga nakumpiska gikan sa gipanag-iyahan niining resort.
Nakahilak pa si Apolinario dihang gipresenta na kini sa media.
