BUTUAN CITY – Malampusong nalarot og nasunog sa kapulisan kagahapong adlawa angdakong plantasyon sa marijuana sa Purok 4 ug Purok 6 a Sitio Kalampayan, Barangay Kasapa 2, La Paz, Agusan del Sur.
Miabot sa katibuk-ang usa ka libo ka punuan sa marijuana nga mitimbang og 61 kilos og nagkantidad sa 3-milyones 355-mil pesos ang nalarot sa kapulisan human ang sunod-sunod nga anti-illegal drugs operations.
Sigon ni Police Supt. Christian Rafols, Regional Information Officer sa Police Regional Office kon PRO-13, gihimu ang maong operasyon sa hiniusang piwersa sa La Paz Municipal Police Station, Agusan del Sur Provincial Mobile Force Company ug Agusan del Sur Provincial Intelligence Branch.
Sumala pa sa opisyal, nakadawat sila ug impormasyon gikan sa nagpakabang lumulopyo mahitungod sa duha ka plantasyon sa maong lugar hinungdan usab sa gihimung bulag nga operasyon.
Miabot sa 400 ka punuan sa marijuana nga mitimbang og 25 kilos ang na-ibot sa Purok 4, Sitio Kalampayan, Barangay Kasapa 2, nga nagkantidad og uno milyones 375-mil pesos samtang laing 600 ka marijuana usab nga dunay kabug-atong 36 kilos sa Purok 6 sa maong barangay nga mikantidad og uno milyones 980-mil pesos.
Giila sa kapulisan ang tag-iya sa maong plantasyon sa marijuana nga sila Rene Salintao ug Bernard Sanggod, kansa target karun sa follow-up operations apan napasakahan na og kaso.
Alayon niini gipasalamatan ni Police Supt. Rafols ang concerned citizens nga mitaho sa impormasyon dungan sa pagbutyag nga kung magtinabangay gayud ang kapulisan ug kumunidad, magmalampuson gayud ang giyera kontra sa illegal nga drugas.
