BUTUAN CITY – Miresulta sa kamatayon sa duha ka tawo samtang lima ang samaran sa ngilngig nga disgrasya nga natigayon kagahapon sa alas 5:00 sa hapon sa may Purok-3, Barangay San Andres, Bunawan, Agusan Del Sur.
Nalambigit sa disgrasya ang usa ka 10-wheeler truck nga gimanihuoan ni Daryll Autor, 34-anyos, ulitawo nga residente sa Brgy. Doongan, Butuan City kauban ang pahinante nga si Stephen Saliganan, 27-anyos ug residente sa Baan Riverside, Butuan City samtang ang kabangga niini ang puting Toyota Hilux, gimanihuan ni Jay-M Jumawan Bagaipo, 26-anyos, ulitawo ug residente sa Purok-8 Pasta, San Francisco, Agusan Del Sur.
Sakay sa iyang sakyanan sila Nelve Boquil, 28-anyos, residente sa San Rafael Prosperidad, Agusan Del Sur; Debby Len Rebulos Gemparo, 26-anyos, residente sa Hubang, San Francisco, Agusan Del Sur; Phillip Chato, 26-anyos, ulitawo, residente sa San Rafael, Prosperidad, Agusan Del Sur; Michael Corvera, 31-anyos, minyo, residente sa P- 6 Poblacion, Baba, Prosperidad, Agusan Del Sur; Christian Pulido, 33-anyos, ulitawo, residente sa P- 2, Pasta , San Francisco, Agusan Del Sur; ug Roberto Magoncia, 42-anyos, ulitawo, residente sa Bunawan , Agusan Del Sur.
Sa imbestigasyon sa kapulisan, padulong sa Davao City ang ten-wheeler truck dihang gibanggaan kini sa kasugat nga sakyanan nga nawad-an og kontrol ang drayber.
Tungod sa kakusog sa pagkabangga, naka-angkon og mga samad ang nalambigit nga mga indibidwal nga daling gidala sa ospital apan gideklarang dead-on-arrival ang drayber sa 10-wheeler truck nga si Daryll Autor lakip na ang usa ka pasahero sa Toyota nga si Deby Len Gemparo.
Sa karun gikustudiya na sa Bunawan Municipal Police Station ang duha ka mga sakyanan alang sa tukmang disposasyon.
