BUTUAN CITY – Wala damha sa pamilya Villanueva sa Brgy. Bancasi ning siyudad sa Butuan nga musangpot sa trahedya ang ila untang family bonding niadtong Dominggo dihang nag-island hopping sa Britania group of islands sa Brgy. Britania, lungsod sa San Agustin, Surigao del Sur.
Kini human mitikla-ob ang ilang gisakyang bangka tungod sa daut nga panahon ug sa dagkong balud sa kadagatan kondiin natabunan sa mitikla-ob nga bangka ang duha ka anak ni Vismin Villanueva.
Sa inisyal nga pamahayag sa ginang, gamay lang matud pa kanila ang nakasuot og life vest tungod kay limitado man ang ihap niini.
Gawas pa, daw kulang matud pa sa life-saving training ang mga bangkero ug ang ilang tour guide rason sa dugay nga pagkakuha sa duha niya ka mga anak nga natabunan sa bangka rason sa pagkamatay sa iyang 8-anyos nga anak ingon man sa iyang ugangan nga na-cardiac arrest.
