BUTUAN CITY – Duha na lang ka mga indibidwal ang padayon pang gipangita sa mga contact-tracers ning siyudad sa Butuan kinsa maoy direktang nakahugoy-hugoy sa pipila ka mga tripolante sa tug boat Clyde ug barge Claudia nga nagpositibo sa COVID-19 dihang midunggo sa Port of Masao sa Brgy. Lumbocan gikan sa Indonesia.
Kini human nagnegatibo sa makamatay nga coronavirus ang tanan nilang gipa-ilalom sa RT-PCR test ug uban pang mga indibidwal nga duna usa’y close contact sa 12 ka mgaCOVID-19 positive nga tripolante.
Sigon ni city administrator Rey Desiata, nagpabiling aktibo ang lokal nga kagamhanan sa gihimong surveillance og contact-tracing niadtong mga nakahugoy-hugoy sa mga tripolante gawas lamang niadtong driver sa motorsiklo ug traysikol nga gisakyan sa duha ka mga mikanaog nga tripolante kondiin ang usa mipa-uli sa Zamboanga City samtang ang laing usa, nagmerkado pa.
Sa eksklusibong pakighinabi sa Bombo Radyo Butuan, gipadayag ni Desiata nga sa pagkakaron, negatibo ang resulta sa tanan nilang gipa-RT PCR test sa tanan nilang na-contact trace kinsa ila unang gi-isoate adiser gipa-RT PCR test paglabay sa pito ka mga adlaw.
Apil na niini ang bus driver ug conductor nga gisakyan niadtong mupa-uli unta sa Zamboanga City apan na-hold diha pa sa Cagayan de Oro City, driver sa bangka nga ilang gisakyan apil na ang mga personahe sa government agencies nga misaka sa tug boat alang sa inspeksyon.
Apan bisan pa man sa negatibong RT-PCR result, dili matud pa angayang magmaya ang mga Butuanon tungod sa duha nga wala pa gihapon nila ma-trace karon ug padayon pa nilang gipangita.
Giklaro pa ni Desiata nga sa mismong adlaw sa pagsugod sa contact-tracing, gi-isolate gilayon ang tanang na-trace samtang gipatuman ang granular lockdown sa ilang pinuy-nan adiser gipa-RT PCR test paglabay sa pito ka mga adlaw.
Angayan lang matud pang mahimong kampante ang tanan kung ma-ilhan na ang nahabiling duha ug ma-trace na usab ang tanan nilang nakahugoy-hugoy.
