BUTUAN CITY – Mikunhod ang gidaghanon sa mga wala’y trabaho sa Pilipinas niadtong Pebrero ning tuiga kondiin sumala sa Philippine Statistics Authority, anaa sa 2.66 milyones ka mga Pilipino ang wala’y trabaho kansa mas ubos kumpara sa 2.96 milyones niadtong Enero ning tuiga.
Apan bisan pa niini nga pag-uswag, mas taas gihapon kini kung ikumpara sa 1.94 milyones nga jobless niadtong Pebrero 2025 — timailhan nga aduna gihapo’y mga hagit nga gi-atubang ang labor sector sa nasud.
Sa porsyento, mi-ubos ang unemployment rate ngadto sa 5.1% gikan sa 5.8% sa mi-aging bulan kansa nagpasabot nga mas daghang Pilipino ang nakakita og trabaho, nga nagdala sa employment rate ngadto sa 94.9%.
Sa aktuwal nga ihap, mga 49.43 milyones ka Pilipino ang adunay trabaho sa Pebrero—usa ka positibong indikasyon nga hinay-hinay nga nag-recover ang ekonomiya apan dili tanan nga adunay trabaho, makonsiderang stable ang kahimtang.
Gawas sa unemployment, gipadayag usab sa PSA ang isyu sa underemployment, nga niabot sa 11.8% kansa nagpasabot nga kapin 5.84 milyones ka mga empleyado ang nanginahanglan pa og dugang oras sa trabaho o lain pang panginabuhian.
Sa yano nga pagsabot, daghan ang adunay trabaho, apan kulang ang kita o oras—usa ka kahimtang nga maka-apekto gihapon sa kalidad sa kinabuhi.
