BUTUAN CITY- Mikabat na sa 173,000 ka pamilya o dul-an 724,000 ka mga indibidwal ang naapektuhan sa kusog nga Magnitude 7.8 nga linog nga miigo sa habagatang bahin sa Mindanao niadtong Hunyo 8, sumala sa Office of Civil Defense.
Sa pinakabag-ong datos, 61 na ang namatay, kapin 1,400 ang angol, ug 40 pa ang gikatahong nawala, samtang padayon ang pagmonitor sa kapin 5,200 ka aftershocks nga na-rekord sukad sa pagtay-og. Gibana-bana usab nga 2,000 ka pamilya ang napabakwit sa ilang mga puluy-anan, lakip na ang kapin 1,000 ka pamilya sa Barangay Lagao sa General Santos City kinsa hingpit nga nawad-an og panimalay.
Mikabat na sa P1 bilyon ang kantidad sa kadaot sa imprastruktura, uban sa gatusan ka nadaot nga mga pasilidad ug liboan ka kabalayan nga partially ug totally damaged. Deklarado na usab ang State of Calamity sa 13 ka mga siyudad ug lungsod, samtang gipahibalo sa Department of Energy kon DOE nga nabalik na ang suplay sa kuryente sa mga apektadong ospital.
Sa pagkakaron, kapin P67.6 milyon nga ayuda ang napang-apod-apod ngadto sa mga biktima sa maong kalamidad.
