BUTUAN CITY – Gimando sa kadumalahan sa Police Regional Office kon PRO 13 ang dinali-ang pag-relieve sa 16 ka mga Chiefs of Police sa Caraga region gikan sa tagsa-tasa nila ka posisyon tungod sa ilang minos nga performance sa anti-illegal drug campaign sa kagamhanan.
Giratipikahan ni Caraga Regional Director, Chief Superintendent Noli Romana, ang rekomendasyon sa Regional Oversight Committee on Illegal Drugs alang sa dinali-ang pag-relieve sa 16 ka mga Municipal Chiefs of Police kinsa wala’y accomplishment og kung duna man, gamay lang diha sa anti-illegal drug campaign sa ilang area of responsibility.
Nagdesisyon ang oversight committee pagrekomenda alang sa pagtangtang sa mga hepe sa kapulisan sa mga lungsod sa Santiago, Las Nieves, Kitcharao og Magallanes pulos sakop sa Agusan del Norte Police Provincial Office.
Kini gawas pa sa mga hepe usab sa kapulisan sa mga lungsod sa Taganaan, Bacuag og San Francisco sa Surigao del Norte Police Provincial Office; apil na sa Cantilan, Marihatag, Cagwait og Madrid sa Surigao del Sur Police Provincial Office.
Sigon ni General Romana, napakyas ang maong mga opisyal pagkab-ot sa requirements nga gipresentar sa oversight committee diha sa ihap sa mga accomplishments sa ilang anti-illegal drugs operation.
Samtang gi-relieve na sa Provincial Director sa Dinagat Islands Provincial Police Office ang iyang lima ka mga Chiefs of Police gikan sa ilang pwesto samtang ang ubang mga low performers gibaharan pagpakusog sa ilang mga operasyon aron dili masusama sa ilang mga ka-ubanan. (Beth Ruiz)
