BUTUAN CITY- Dili mo-unos sa 14 na ka-tao ang patay human ang usa ka gidudahang suicide bombing gawas sa opsina sa pulisya sa amihanan-kasadpan sa Pakistan.
Nahitabo ang pagbusikad sa Kabal area sa Swat district sa Khyber Pakhtunkhwa province.
Sumala sa mga awtoridad, lakip sa mga nasawi ang lima ka pulis, walo ka sibilyan, ug ang gituohang suicide bomber.
Mo-abot usab sa 18 ang angol sa insidente.
Dungan sa pagbuto, adunay gihimong pro-police rally sa lugar, apan dili pa klaro kung kini ang target sa pag-atake.
Gi-angkon sa militanteng grupong Tehreek-e-Taliban Pakistan ang tulobagon sa insidente.
Nagpadayag usab og grabe nga pahasubo si Pakistani Prime Minister Muhammad Shehbaz Sharif ug gikondina ang pag-atake.
Naglunsad na usab og operasyon ang pulisya aron matumbok ug madakop ang uban pang posibleng nalambigit sa pagpamomba.
Padayon nga nag-atubang ang Pakistan sa minggrabe nga insurgencies, hilabi na sa mga border niini, kung asa kasagari nga target sa mga pag-atake ang mga pulis ug militar.
Padayon usab nga gi-akusahan sa Pakistan ang Taliban sa Afghanistan nga naghatag og suporta sa mga militanteng grupo, usa ka alegasyong hugot nga gilimod sa Taliban.
