BUTUAN CITY – Magtagbo karong adlawa ang 13 ka mga komite sa House of Representatives sa pagpanguna ni House Speaker Faustino ‘Bojie’ Dy aron hisgutang ang angayang buhaton sa padayong pagsaka sa presyo sa lana tungod sa nagpadayong giyera sa Middle East.
Ang tigom nga pangunahan ni Committee on Ways and Means chairman ug Marikina Rep Miro Quimbo, magtigom sa mga datus sa ingon makamugna og tukmang lakang alang sa pagpangita gilayon og malahutayong solusyon sa krisis sa lana ug maghatag og tabang.
Hisgutan usab nila ang sitwasyon karon sa enerhiya sa nasud, apil ang epekto niini sa ekonomiya ug mga palisiya.
Sigon ni Rep Quimbo, importante ang koordinasyon sa lehislatura ug ehekutibo aron paspas nga mapatuman ang mga lakang nga matabang sa pinaka-apektadong sektor sa katilingban.
Gila-uman usab nga susihon sa multi-committee body ang mga targeted nga ayuda, suportang pisikal, ug mga repormang istraktural aron maminusan ang epekto sa pangkalibutanong oil shock sa nasud.
