BUTUAN CITY – Nakatala na usab og usa ka bag-ong patay ang Caraga Region tungod sa COVID-19 ug laing 20 ka bag-ong kaso nga gilangkuban sa 14 ka mga babaye ug 6 ka mga lalaki kondiin 60-porsiento niini anaa sa age bracket nga 31 hangtud 60-anyos.
Pinakadaghan ang natala sa Agusan del Sur nga mi-abot sa pito ka kaso gikan sa mga lungsod sa San Francisco-4, duha saTalacogon ug usa sa Esperanza.
Mitala usab og pito ka kaso ang lungsod sa Tagbina sa Surigao del Sur, ug unom ning siyudad sa Butuan nga nabahin sa tag-usa sa Brgy. Baan Km. 3; Dagohoy, Doongan, Libertad, Ong Yiu, ug Villa Kananga.
Ang namatay mao ang 56-anyos nga babayeng taga-Mainit, Surigao del Norte nga wala’y comorbidity apan nakasinati og lisod nga pagginhawa niadtong Oktubre 3, na-admit sa Oktubre 7 ug namatay niadtong Nobyembre 6 tungod sa mga komplikasyon.
Sa kasamtangan, nakatala na ang Caraga Region og 3,565 ka cumulative COVID-19 cases, kondiin 455 niini ang mga aktibong kaso, 2,944 ang mga nakarekober samtang 166 na ang natalang patay.
