BUTUAN CITY – Terminated na sa ilang trabaho ang tulo ka mga empleyado sa Butuan City Airport human nagpositibo sa gihimong random drug test sa Civil Aviation Authority of the Philippines o CAAP.
Sigon ni Atty Jinky Zaragosa-Ang, acting manager sa Butuan City Airport, ang tulo gikan sa unom ka mga airport personnel sa tibuok nasud nga nagpositibo sa drug test, nga gihimo niadtong buwan sa Hulyo.
Sa eksklusibong interview sa Bombo Radyo Butuan, gipadayag ni Atty Ang nga sa maong ihap, duha niini ang mga job order personnel samtang usa ang outsourced employee.
Gihimo matud pa ang random drug test sa kapin usa ka gatus ka mga naka-duty nilang empleyado kansa katunga gikan sa kapin 200 nilang ihap.
Giklaro usab ni Atty Ang nga ang mga sakop sa Office of the Flight Surgeon and Aviation Medicine ang mihimo sa random drug test nga bisan silang airport managers, wala’y kasayuran niini tungod kay random kining gihimo sa tanang tugphanan sa nasud.
Nagpasalamat kini sa Bombo Radyo Butuan sa higayon nga gihatag kanila aron mapasabot ang nahitabo ngadto sa publiko dungan sa pagpasabot nga alang kini sa kaayuhan sa publiko ilabina sa mga sumasakay.
