BUTUAN CITY – Gitangtang sa Miss Universe Philippines Organization (MUPH) ang usa sa ilang mga kandidata alang sa 2026 nga pageant human sa gihimong imbestigasyon kabahin sa gi-ingong dili angay nga pamatasan sa maong kandidata.
Sa gipagawas nga pamahayag sa MUPH, giingon sa organisasyon nga nakadawat sila og mga reklamo batok sa maong kandidata. Gipa-ilawom gilayon kini sa usa ka makuting review, ug gihatagan usab og verbal ug written nga pahimangno aron matul-id ang iyang pamatasan.
Bisan pa niini, sumala sa MUPH, nagpadayon gihapon ang pipila ka mga lihok sa maong kandidata nga dili uyon sa ilang sumbanan sa respeto ug propesyonalismo hinungdan nga nakahukom sila nga dili na tugotan ang maong kandidata nga mupadayon sa kompetisyon.
Wala usab gipahibalo sa publiko ang pangalan sa gitangtang nga kandidata, ingon man ang insaktong detalye sa insidente tungod kay ang ilang tumong nga mapadayon ang hapsay ug positibong palibot alang sa tanang mga kandidata.
Tungod niini, gikan sa orihinal nga 51 ka kandidata, 50 na lamang ang mag-indigay sa ka-anyag ug ka-utukan sa himoong coronation night sa Mayo 1 sa Mall of Asia Arena.
