BUTUAN CITY – Mikalasa kinabuhi sa usa ka tawo samtang pipila ang na-angol sa tunga-tungang bahin sa Israel tungod sa pagpamusil nga sumala sa kapulisan usa kini ka teroristang pag-atake.
Nasayrang usa ka lalaki nga nagpangedaron og 30 anyos ang gipusil ug napatay sa usa ka gasolinahan sa Kochav Yair, usa ka lungsod nga nahimutang sa Green Line nga nagbulag sa Israel ug sa okupadong West Bank samtang 5 pa ka laing tawo sa dili momenos sa tulo ka managlahing dapit ang naangol usab lakip na ang duha nga anaa sa seryosong kondisyon.
Sumala sa kapulisan nga ilahang na-neutralize o napatay ang usa ka suspek human nakit-an ang usa ka sakyanan nga gituohan nilang nalambigit sa pagpamusil. Padayon karung gisusi sa otoridad kung duna pabay kaubanan ang napatay nga suspek sa dihang gihimo ang pag-atake.
Ang suspek usa ka lungsoranon sa Israel nga lumad nga taga-Tayibe, usa ka Arabong lungsod sa amihanang bahin sa Kochav Yair.
Alayon niini nagpahigayon og dinalian nga panagtigom si Prime Minister Benjamin Netanyahu aron masusi ang sitwasyon human sa maong pag-atake.
Samtang gidayeg usab sa Hamas ang maong pag-atake diin ilang gipahayag nga tubag kini sa “nagpadayong agresyon sa Israel batok sa Gaza Strip” ug sa “mga pag-atake nga nasinati sa katawhan matag adlaw didto sa West Bank ug Jerusalem.”
