BUTUAN CITY – Emosyunal ang informal send-off nga gihatag sa mga health workers sa Caraga Regional Hospital sa Surigao City dihang gi-discharge kaganina ang unang COVID-19 positive ning rehiyon.
Sa video nga ilang gi-post, makita ug madunggan ang kamingaw nga ilang gibati dihang pabiya na ang 65-anyos nga si Tatay Willie kinsa gipabawnan pa nila og mga mensahe sa pagtimbaya sa malampusong paglabang niya sa makamatay nga coronavirus.
Bisan og naka-face mask apan mabasa sa panagway sa COVID-19 survivor ang kalipay sa gihimong pag-atiman kaniya ug ang ilang hugyaw sa kalipay nga hingpit nang nakagawas sa maong ospital ang gi-atiman nilang pasyente.
Mabati usab ang kalipay sa ilang pagpanamilit kang Tatay Willie nga gipakapinan pa sa pagpahinumdom kaniyang magsuot kanunay og mask. Igo na lang nagwara-wara sa iyang kamot ang survivor isip pasalamat sa maayong pag-atiman nga iyang na-angkon gikan kanila.
