BUTUAN CITY – Mipasalig ang bag-ong tukod nga Truth Commission nga magpabilin silang independent sa ilang imbestigasyon sa mga kamatay nga nahitabo sa panahon ni kanhi Pangulong Rodrigo Duterte ug sa ubang administrasyon nga adunay mga kaso sa human rights violations.
Bisan pa man saad ni Philippine National Police (PNP) PGen. Melencio Nartatez Jr. nga motabang sa proseso, giklaro ni Commissioner Carlos Conde nga ang komisyon magpabilin nga gawasnon sa pag-analisa ug pagsusi sa mga panghitabo aron makamugna ug independent report.
Ang maong report importante aron mahimong pahimangno sa duguong drug war nga nakapatay sa kapin 30,000 ka tawo, base sa mga independent human rights watchdog.
Gipasalamatan usab ni Conde ang interes sa kapulisan nga makig-alayon ug iyang gisiguro nga ang tanan nga gustong mosulti ug mosaysay sa ilang kasinatian hatagan ug higayon nga madungog.
Sa pagkakaron, adunay inisyal nga listahan ang Truth Commission sa mga survivors ug pamilya sa mga biktima nga ilang target maka-istorya. Aduna usa’y pipila ka pulis nga nagpadayag sa interes nga mosulti, apan dili pa sila apil sa initial list samtang nagpadayon pa ang validation.
Ang komisyon nga independent, non-government body naporma lang ning mi-aging semana ug pangunahan ni kanhi International Criminal Court Judge Raul Pangalangan.
