BUTUAN CITY– Gi-anunsyo ni U.S. President Donald Trump niadtong Miyerkules (adlaw sa Amerika) nga ang mga import gikan sa mga nasud nga maghatag og military weapons sa Iran ilang pahamtangan og 50% nga taripa, nga walay exception.
Gihimo ni Trump ang anunsyo sa iyang Truth Social pila ka oras human ang kasabutan nga duha ka-simana nga ceasefire sa Tehran. Wala na usab gihisgutan ni Trump kung unsang legal authority ang iyang gamiton sa pagpatuman og taripa, human gikuha sa Supreme Court of the United States niadtong Pebrero ang paggamit niini og International Emergency Economic Powers Act (IEEPA) aron magpahamtang og dako nga global tariffs.
Tungod niini, gimando sa lower court ang refund sa kantidad nga labing-minus $166 billion nga nakolekta sa nasud sulod sa usa ka tuig. Ang IEEPA law gigamit na sukad niadtong 1977 aron suportahan ang mga financial sanctions batok sa Iran, Russia, ug North Korea, apan gitumbok sa korte nga minglapas na si Trump sa paggamit niini alang sa trade tariffs.
Wala na usab gihisgutan sa Amerika ang mga nasud nga posibleng pahamtangan og taripa, apan na-ilang mingtabang ang China ug Russia sa Iran sa pagpakusog sa military capability niini, lakip ang mga missile, air-defense systems, ug teknolohiya alang sa ilang depensa batok sa U.S. ug Israel.
