BUTUAN CITY – Wala na makalingkawas sa gilusad nga entrapment operation sa mga otoridad pasado alas-7:00 kagabii sulod sa usa ka mall sa General Santos City ang usa ka tricycle driver human nangmolestiya og 15-anyos nga estudyante.
Gi-agbayan pa sa suspetsadong si Arwin Badsalaw Hasim, 29 anyos, drayber sa traysikol, minyo ug residente sa Purok Mudia Extention, Barangay Labangal, General Santos City ang biktimang gitago lang sa pangalang Inday atol sa ikaduha nilang panag-agbat human nga una niining gibastos ang biktima sa iyang paggawas sa eskwelahan.
Base sa reklamo sa grade 9 student nga biktima, gipugos matud siya sa driver nga ihatag ang iyang numero dayong kuha sa iyang wala nga kamot ug gibutang sa tuo nga bukton sa suspetsado ug dinhi na siya gigakos kaniya ug hikap sa iyang dughan.
Nasayrang gidala pa siya sa suspetsado sa likod sa gate sa ilang eskwelahan ug sa wala pa siya mokanaog sa nahisgutang traysikol, gigakos siya og hugot ug gi-lips to lips.
Gisuwayan niya pagtukmod ang suspetsado palayo apan wala musalir ang iyang kusog ug swerte na lang nga naka-ikyas siya ug nakadagan padulong sa ilang compound.
Dihang mi-contact kini kaniya, dinhi na gihimo ang entrapment operation sa kapulisan.
