BUTUAN CITY – Nagtapok sa Brgy. Los Angeles ning siyudad sa Butuan ang mga tribung Mamanwa ug Manobo gikan sa nagkada-iyang bahin sa Caraga Region aron hini-usang ipa-abot sa sentrong buhatan sa National Commission on Indigenous People kon NCIP ang ilang pagsupak nga ibalik og tuboy isip regional director dinhi sa rehiyon si Ordonio Rocero, Jr., taliwa nga gibalik na og assign ning tuiga lang ang lumad nga Caraganon nga si Atty. Ferdausi Cerna.
Sa asuy ni Datu Roque Pineg sa tribong Manobo gikan sa lungsod sa Carmen, Surigao del Sur, gituyo nila ang pagbiyahe og layo aron lang makighi-usa sa mga Mananwa nga sama kanila gustong si Atty. Cerna ang padumalahon sa rehiyunal nga buhatan sa NCIP tungod kay kini matud pa ang tinuod nga naglantaw sa kaayuhan sa mga lumad.
Sukwahi matud pa kini kang Rocero nga bisan sa pagsulod lang sa NCIP-Caraga regional office, ihikaw pa kanila ug gisi-on matud pa ang papel nga ilang sulatan sa ilang mga yangungo.
Dugang pa ni Datu Pineg, si Atty. Cerna lang ang nagpasig-uli sa maayong kabubut-on sa duha ka tribo human ang pila ka tuig nilang bangi tungod kay mangunay matud pa kini pagbisita sa ilang komunidad aron lang personal nga masuta ang hinungdan sa ilang bangi ug pangitaan gilayon niini og solusyon.
