BUTUAN CITY – Dako kaayo og kawad-on sa inadlaw nga panginabuhian sa transport sector ang bigtime oil price hike nga gipatuman sa mga dagkong kompanya karong adlawa ilabina sa diesel nga mi-abot sa P6.85 ang gisaka sa kada-litro.
Sa eksklusibong pakighinabi sa Bombo Radyo Butuan, gipadayag ni Juanito Ubas, presidente sa Caraga Transport Service Federation, nga mireklamo na matud pa ang pipila sa iyang mga ka-ubanang drivers tungod kay gidula-dulaan lang matud pa sila sa mga kompanya sa lana.
Kini tungod kay sulod sa lima ka semanang rollback sa presyo sa pila lang ka sentabo, gilamoy ra gihapon kini sa one time, bigtime nga pagsaka sa presyo niini.
Ang ila matud pang matubil nga usa ka litro, bugti lang sa usa ka round nila nga pagpamasada kondiin ang uban, dili na matud pa makatuyok tungod sa kalayo sa ilang ruta.
Tungod niini, plano nilang mudangop ngadto kang Department of Energy Sec. Rafael Lotilla aron ma-abagan sila sa ilang problema ilabina nga wala gipaboran ang ilang nasudnong hangyo nga dakong usbaw sa plitehan ug ang paghatag unta sa gobyerno kanila og ayuda kansa hangtud karon, na-ataw ataw pa ilabina nga wala usa’y klaro kung mapadayon pa ba ang service contracting.
Sa piaks bahin, igo na lang sa pagpangawot sa ulo ang mga drivers sa traysikol human nakuratan nga misaka na ang presyo sa gasolina sa ila nang pagpatubil kaganinang sayo sa buntag.
Sigon sa usa sa mga drivers nga si Carlos Uwigon, wala na matud pa siya’y mahimo kondili mubayad na lang og insakto tungod kay mao naman kini ang usbaw sa presyo nga gipatuman sa mga kompanya sa lana nga mu-abot sa P1.20 kada-litro.
Nagkatawa na lang siya tungod kay imbes magtibo siya og palit balor upat ka litro sa pangindahay nga makapundo samtang wala pa’y increase, na-ulahi na man diay hinuon siya sa balita tungod kay didto na man sa iyang pagpatubil siya nakahibalong misaka na diay ang presyo sa gasolina.
Hinuon sa mao matud pa nga usbaw, segurado siyang duna pa siya’y madala nga ginansya alang sa iyang pamilya.
