BUTUAN CITY – Gihulagway ni House prosecutor ug Iloilo Rep. Lorenz Defensor nga “appetizer” pa lang ang testimonya sa duha ka kanhi branch managers sa government bank sa impeachment trial batok kang Vice President Sara Duterte nga may kalabotan sa gika-ingong sayop nga paggamit sa confidential funds.
Sumala ni Defensor, ang gisaysay nila kanhi LandBank-Shaw Boulevard branch manager Violeta Constantino ug kanhi LandBank-DepEd branch manager Nenita Camposano nga “unusual” ang pag-encash sa dagkong kantidad sa tseke, sinugdanan pa lang sa daghan pa nga mga ebidensya nga ipresentar sa prosecution aron mapamatud-an ang betrayal of public trust ug culpable violation of the Constitution.
Madumdumang sa pagdungog kagahapon, gikumpirma ni Constantino ang pag-encash sa upat ka tseke sa Office of the Vice President nga nagkantidad og P500 milyon, samtang si Camposano mitestigo sa pag-encash sa tulo ka tseke sa Department of Education nga nagkantidad og P112.5 milyon.
Kabahin kini sa P612.5 milyon nga confidential funds nga gi-imbestigahan sa impeachment trial.
Samtang gibutyag usab ni House prosecution spokesperson ug Lanao del Sur Rep. Zia Alonto Adiong nga dili lang ang kantidad ang mamatikdan, kundili apil usab ang paagi sa pag-encash.
Giingon niya nga ang regular nga iskedyul, parehas nga kantidad, ug sayo nga koordinasyon sa bangko nagpakita og klarong pattern nga sukwahi matud pa sa kasagarang operasyon sa intelligence funds.
