BUTUAN CITY – Mayoriya gihapon nga local positions sa eleksyon ang makuha sa Team One Butuan kon Team Ronnievic Conde Lagnada (Team RCL) kung karong adlawa pa gihimo ang lokal ug national elections.
Base na kini sa gipagawas nga resulta sa Policy and Research Center sa Father Saturnino Urios University kon FSUU alang sa unang hugna sa ilang Opinion Poll 2022.
Gihimo kini nga survey niadtong Marso 28 hangtud Abril 6 ning tuiga ngadto sa 4,829 ka mga Butuanons gikan sa 86 ka mga barangay kansa 2-porsiento lang sa 225,895 nga kinatibuk-ang voting population ning siyudad.
Tinguha sa survey nga ma-assess ang katuyuan ug pagsabot sa orientation nga ang mga prospective candidates kinahanglang magpadayon aron mahimong mas nindot nga lugar alang sa katawhan ang dakbayan apil na ang nasud sa kinatibuk-an.
Gipasabot usab sa organizer sa survey nga ang resulta wala gituyo pagkumbinsi o kaha pag-agni sa mga botante kondili aron lang pag-abag kanila sa paghimo og puno sa impormasyon nga desisyon alang sa umaabot nga eleksyon.
Alayon niini diha sa mga local positions ilabina sa pagka-kongresista, nanguna ang pambato sa Team RCL nga si incumbent Vice Mayor Jose Aquino II kinsa nakakuha og 45.54-porsientong boto nga gisundan ni Kidz Libarios nga duna’y 11.43-porsientong boto dayon si Ronnie Azarcon nga duna’y 8.72-porsiento samtang punto-17 porsiento ang kang Erwin Orlanda ug 34.15-porsiento ang wala pa makadesisyon.
Sa pagka-mayor, nanguna gihapon si incumbent Mayor Ronnie Vicente Lagnada nga duna’y 52.14-porsientong nakuhang boto, nga gisundan ni Norbert Pagaspas nga nakakuha lang og 17.89-porsiento dayon si Edward Chan nga duna’y punto-23 porsiento ug Myrna Bernados nga duna’y .09-porsiento samtang 29.65 ang wala pa makadesisyon.
Sa pagka-besi mayor, nanguna gihapon ang taga-Team RCL pinaagi ni incumbent Congressman Law Fortun nga nakakuha og 54.92-porsiento nga gisundan ni Dolly Veraque kinsa nakakuha og 11.30-porisento ug Carlos Tan nga duna’y punto-68 porsientong boto samtang 51.13-porsiento pa ang undecided.
