BUTUAN CITY- Nagpadayon ang pagsidlak sa Team Caraga sa 2026 Palarong Pambansa sa Agusan del Sur human madugangan ang medal tally pinaagi sa mga Butuanong atleta nga nagpasundayag sa Arnis ug Karatedo.
Nasakmit ni Angela Mejias sa Ampayon Central Elementary School ang gold medal sa Arnis Individual Espada y Daga Weapon Elementary Girls category, samtang si Chinn Jo Auxtero nakakuha og bronze medal sa Likhang Anyo Double Identical Weapon category ug nakahatag usab og unang gold medal sa Caraga sa Arnis event. Dugang pa, si Rayven Maratas sa Agusan National High School nakadaog og bronze medal sa Arnis Likha Anyo Individual Double Weapon Secondary Boys category, ug si Kyle Gio Rosales, 13-anyos nga Karatedo athlete gikan sa Butuan City, nakakuha og bronze medal sa secondary category.
Kini nga mga kalampusan naghatag og dakong dungog sa rehiyon ug nagpamatuod nga daghan pang batan-ong atleta ang adunay talento ug potensyal nga makiglumba sa nasudnong lebel samtang nagpadayon pa ang ubang sporting events sa Palarong Pambansa.
