BUTUAN CITY – Temporaryong gipasira sa lokal nga kagamhanan sa Cabadbaran City, lalawigan sa Agusan del Norte, pinaagi sa gipagawas nga executive order ni Mayor Judy Chin-Amante, ang tanang poultry farms ug poultry-raising establishments tungod sa pagdagsa sa daghang mga langaw nga hulga sa panglawas sa mga Cabadbaranons.
Gikumpirma kini ni Cabadbaran City government spokesperson Roselyn Exaure tungod sa balik-balik nang problema sa mga langaw matag-harvest season sa mga poultry farms taliwa nga pulos matud pa kini aduna’y business permit.
Apil niini nga mga brangay ang Brgy Catugasan, Calibunan, Bayabas ug Concepcion.
Sa eksklusibong pakighinabi sa Bombo Radyo Butuan, gipadayag ni Exaure nga magpabiling sirado ang maong mga establisamiento samtang nagpadayon ang imbestigasyon aron masuta ang hinungdan niini taliwa nga nasayod nang daan ang mga poultry farm operators sa paagi aron dili mudugok ang mga langaw.
Duna’y mugnaong special task force aron maoy muhimo og citywide investigation sa ingon madokumento gayod ang mga kalapasang nahimo sa ingon ma-aksyunan gilayon kini.
Aminado si Exaure nga posibleng duna’y gamay nga pagpasagad taliwa sa management sa maong mga farms rason sa padayong monitoring sa ilang mga sanitary officers uban sa mga personahe sa City Health Office.
Nasayrang medyo mahal ang medisina nga gamiton sa pag-spray matag-harvest season ug gitu-uhan sa opisyal nga hayan gitipid-tipid ang paggamit niini hinungdan nga wala matuman ang ilang obligasyon nga likayan ang pagkaylap sa mga langaw.
