BUTUAN CITY – Dili undangan sa lokal nga kagamhanan sa San Luis, Agusan del Sur ang ilang search and rescue operations alang sa nahabilin pang mga biktima sa rock ug landslides sa Brgy Mahayahay ning mi-aging gabii.
Kini human una nang nakuha ang duha ka mga patay’ng lawas nila Junard Gonzales, driver sa nadat-ugang Saddam truck ug ang 3-anyos nga batang si John Paul Abunda.
Samtang ang padayon pang gipangita, mao ang apuhan sa bata nga sila Helen ug Gerry Abunda, ingon man ang driver sa motorsiklong magkuha lang unta og bugas ug ang kargador.
Sigon ni Mayor Ronald Corvera, hatagan nila og tabang ang kabanay sa mga biktima ka-uban ang Municipal Social Welfare and Development Office.
Gipa-paspasan usab niya pagpa-clearing ang dalan aron maagi-an na niadtong mga taga-Brgy Binicalan ug Mahayahay nga gustong mutabok padulong sa sentrong bahin sa lungsod ilabina kung duna’y emerhensya.
