BUTUAN CITY – Gitumbok ni Datu Rico Maca, Indigenous People’s Mandatary Representatives kon IPMR sa San Miguel, Surigao Del Sur nga aktibong miyembro sa New People’s Army kon NPA ang gipasi-atab sa grupong Karapatan nga sila Michelle Campos og Genasque Enriquez, nga missing matud pa human gi-aresto sa militar.
Sumala pa ni Datu Maca nga dili sila lehitimong lider sa lumad kundi mga rebelde dayung butyag nga usa ka pagpanglingla lang ang pekeng balita nga gi-post sa social media.
Gane gikumpirma sa Datu nga si Michele Campos ang lakip sa nadakpan sa gihimong hotpursuit operation sa 3rd Special Forces Battalion ilalom sa operational control sa 401st Infantry Brigade. Makita sa hulagway nga taas pa ang buhok ni Michele Campos sa gipost sa Karapatan apan mubo og buhok na sa dihang nadakpan og dunay samad sa iyang ba-ba.
Gitawag usab ni Datu Maca ang grupong Karapatan tungod kay wala may pagmina nga natigayon sa Andap Valley Complex sa Surigao del Sur sukwahi sa ilang propaganda nga mao kini ang ilang gipakigbisogan.
Samtang padayon usab nga gi-awhag ni Datu Rico Maca ang katawhan nga dili mag-kumpiyansa bisan ug naluya na ang NPA tungod kay makahatag gihapon kini og hulga sama sa ilang pag-ambush-patay sa usa ka CAFGU sa Agusan Del Sur.
Lakip sa gipasidan-an ang mga kabatan-onan nga dili magpadala sa pag-recruit nga gihimo sa rebelde. Kini dayung awhag sa mga anaa pa sa bukid nga musurender og mobalik na sa balaod.
