BUTUAN CITY – Gikumpirma ni Bislig City acting fire marshal Fire Sr Insp John Rey Mejores nga dili pag-collapse sa tunnel ang hinungdan sa pagkamatay sa upat ka mga minero kondili tungod sa nalanghab nilang makahilo nga gas.
Kini human nga malampusong narekober sa mga sakop sa Bislig City Central Fire Station sa Surigao del Sur ang upat ka patay’ng lawas sa mga biktima ilawom sa cave system sa Sitio Sikahoy, Barangay San Jose, sakop sa maong siyudad.
Atol kini sa gilusad nga search and retrieval operation uban sa mga sakop sa City Disaster Risk Reduction and Management Office kon CDRRMO-Bislig.
Sigon ni Sr Insp Mejores nga maoy nagsilbing incident commander, gibana-banang 22-kilometro ang gilay-on sa maong lugar gikan sa fire station, diin 12 kilometro niini ang gikan sa highway padulong sa sitio ug laing 3 kilometro pa ang ilang gibaktas padulong sa tunnel.
Sa ilang pag-abot sa lugar, ilang na-abtan ang mga ka-ubanan sa mga minero nga nagpa-abot sa gawas sa tunnel, lakip na ang ilang engineer.
Matod ni Mejores, usa lang ang orihinal biktima, apan tungod usab sa paningkamot nga matabangan ang maong biktima, mingsulod usab ang ilang mga kaubanan hangtud nga wala na sila makagawas pa.
