BUTUAN CITY- Mipadayag og kabalaka ang usa ka residente sa Barangay Taligaman kabahin sa nagpadayong pagsaka sa presyo sa petrolyo ug mga palaliton kansa direktang nakaapekto sa adlaw-adlaw nga panginabuhi sa mga katawhan.
Sumala ni Aiza Supas, nga bisan lisod sabton ang komplikadong sitwasyon sa merkado ug petrolyo, klaro na matud pa kaayo ang epekto niini sa panginabuhi sa katawhan.
Matud niini, ang tensyon sa Middle East maoy hinungdan sa pagsaka sa presyo sa gasolina diin asa nagdala og sunod-sunod nga pagsaka usab sa mga palaliton.
Gipatin-aw usab ni Supas, nga daw adunay “chain reaction” ang pagsaka sa presyo sa petrolyo, tungod nagdepende ang Pilipinas sa imported nga lana gikan sa Middle East, mao nga dali ra matakdan ang lokal nga merkado sa bisan unsang krisis sa maong rehiyon.
Gani, dili lang pamasahe ang naapektuhan, kundili lakip usab ang produksyon, agrikultura, transportasyon, ug uban pang industriya ingon man ang inflation sa nasud.
Sumala ni Supas, kung mosaka ang inflation, tanang sektor sa ekonomiya maapektuhan, ilabi na ang mga ordinaryong konsumidor nga naglisod na sa pag-budget sa ilang adlaw-adlaw nga gastohan.
Gisugyot usab ni Supas ang paggamit og “coping mechanisms” aron makalahutay, lakip niini ang pagpananom og gulay sa kaugalingong backyard aron makamenos sa gasto sa pagkaon ug dili na kinahanglan mopalit pa sa merkado
