BUTUAN CITY – Nanawagan si Senador Christopher Lawrence Bong Go sa publiko og pag-ampo alang kang kanhe Executive Secretary nga si Salvador Medialdea human kini naospital ug nakatakdang moagi og usa ka medical procedure.
Sumala sa senador, ipahigayon ang procedure kang Medialdea pagkasunod adlaw, mao nga nangayo siya og hiniusang pag-ampo aron magmalampuson kini.
Una nang gibutyag ni Go nga nakabati og dili maayong kahimtang sa panglawas si Medialdea samtang naghatag og mensahe sa usa ka solidarity walk sa Davao City isip pagsaulog sa ika-81 nga adlaw nga natawhan ni kanhi Presidente Rodrigo Duterte niadtong Marso 28.
Tungod niini, wala niya nahuman ang iyang mensahe ug gilayon siyang gidala sa ospital.
Si Medialdea nagsilbi isip Executive Secretary sa administrasyon Duterte, diin si Go kaniadto usa ka presidential aide.
Sa pagkakaron, apil usab siya sa legal team sa kanhi presidente, nga nakadetine karon sa The Hague tungod sa iyang giatubang nga kaso nga crimes against humanity sa international court.
