BUTUAN CITY – In-place na ang security plan sa Butuan City Police Office kon BCPO alang sa Oplan Ligtas Undas 2022 sunod buwan.
Sa eksklusibong pakighinabi sa Bombo Radyo Butuan, gipadayag ni BCPO spokesperson PLt. Anne Cubio, ka-abag nila sa pagpatuman og hugot nga siguridad sa mga sam-ang ang lokal nga kagamhanan, mga concerned government agencies ug ubang stakeholders.
Kini aron mamintina gihapon ang kahapsay ug kalinaw sa tanang sam-ang sa mismong adlaw sa Kalag-Kalag sa Nobyembre uno ug dos.
Nanawagan kini sa tanang mudu-aw sa lubong sa ilang mga namatay nang mahal sa kinabuhi nga mas maayong sayo nila kining himuon ilabina ang pagpanghinlo aron dili magdasok sa mismong mga adlaw sa kalag-kalag.
Subli usab nga gipahinumdom niini ngadto sa tanan nga hugot gihapong gibawal ang pagdala og mga ha-it nga hinagiban bisan og kini gamiton pa sa pagpanglimpyo ingon man ang pagdala og mga ilimnong makahubog.
Gipahinumduman usab sa opisyal ang tanan nga ang seguridad sa matag-usa, responsibilidad sa usab sa matag-usa rason nga kinahanglan matud pang mag-amping ang tanan.
