BUTUAN CITY – Gipasabot ni PCaptain Sayson Cañete, hepe sa Sibagat Municipal Police Station nga ang kawala na’y tsansa nga buhian pa sa hostage-taker ang pasahero sa bus nga iyang gigunitan ug giti-unan og kutsilyo taliwa nga gi-uyunan na siya sa iyang demand, ang rason nga gipusil nila kini hinungdan sa iyang kamatayon.
Gibutyag sa opisyal nga dihang nadawat nila ang tawag kalabot sa maong insidente nga natigayon niadtong alas-12:42 sa kaadlawon sa mismong adlaw sa Pasko didto sa Purok 2, Brgy. Poblacion Sibagat, Agusan del Sur, iya gilayong gimanduan ang iyang mga sakop nga suuton ang uniporme sa conductor ug sa driver sa Bachelor Express Incorporated.
Dihang nanulod na ang iyang mga sakop, dinhi na niya gisultihan ang hostage-taker nga taga-Brgy, Libertad ning siyudad sa Butuan na ihatud na siya base sa iyang demand bugti sa pagbuhi sa pasahero ug sa iyang pagkanaog kunuhay apan mitago ra duol sa driver samtang padayong gi-negotiate sa iyang mga sakop.
Apan inay nga mukalma, mas nahimo matud pang agresibo ang thostage-taker nga mi-aksyon na og luba sa pasahero hinungdan nga dinhi na nila kini gipusil.
