BUTUAN CITY- Nasilotan sa korte sa London si Roman Lavrynovych, 22-anyos, Ukrainian builder, human mapamatud-an nga nakig-conspire sa pagpanigbasog og arson nga naglakip sa pagsunog sa balay ni United Kingdom Prime Minister Sir Keir Starmer.
Sumala sa imbestigasyon, si Lavrynovych gi-recruit pinaagi sa Telegram sa usa ka handler nga naggamit sa inisyal nga “EL,” kansa giingong adunay koneksyon sa Russian state ug nag-awhag sa mga sabotahe ug propaganda batok sa Britanya. Ang mga mensahe nga nakuha nagpakita sa paghimaya kang Russian President Vladimir Putin ug sa pagpasalig og Russian citizenship isip hulip sa mga pag-atake.
Lakip sa mga ebidensya mao ang electronic messages, video recordings ug testimonya nga nag-konektar sa mga akusado sa krimen. Duha ka laen pang suspek ang giakusahan sa pagtarget sa sakyanan ug balay nga konektado sa prime minister, samtang usa ka akusado gi-acquit. Gipahayag sa Russian Embassy nga wala silay kalabutan sa insidente ug gilimod ang tanang pasangil.
