BUTUAN CITY – Halos dili pa makatarong og istorya ang usa ka 19-anyos nga dalaga human gipanamas-tamasan sa usa ka habal-habal driver dihang nagpahatud siya sa ilang pinuy-anan dinhi sa dakbayan sa Butuan.
Nasayrang midangop sa barangay hall sa Brgy Pinamanculan ning siyudad ang biktimang gitago lang sa pangalang Inday, residente sa Brgy Pagatpatan, Butuan City human matud pa siya gi-abusuhan sa driver sa gisakyan niyang habal-habal kagabii.
Gika-ingong didto sila sa iyang mga barkada sa lungsod sa Buenavista, Agusan del Norte kondiin nagkabuwag-buwag sila rason nga misakay siya sa habal-habal nga nakaparada matud pa sa crossing sa town proper.
Inay ihatud sa ilang panimalay, gidala matud pa siya sa suspek sa usa ka payag dapit sa National Irrigation Administration (NIA) canal sa Brgy Pinamanculan ug gibaharan nga patyon rason nga nakuha niini ng iyang pagkababaye.
Dali matud pang misibat ang suspek nga nagsuot og kolor pula nga t-shirt ingon man itom nga maong short pants dayong bitbit sa iyang iPhone 7.
Base sa iyang nadumduman, de-clutch ang kolor itom nga motorsiklo sa suspetsado nga duna’y led light nga color blue sa ilalom nga bahin nga padayon nang gipanubayan sa kapulisan sa Butuan City Police Station-3.
