BUTUAN CITY – Daling nakakuha og atensiyon ang usa ka video diin makita ang talagsaong puti nga unggoy sa lasang sa Kilangil, Sitio Tudog, Barangay Bugso, Senator Aquino, Sultan Kudarat.
Ang maong video gi-post online niadtong nakalabay nga adlaw.
Sumala sa usa ka Belshazaao Hibaler, ang executive assistant/promotion and marketing staff sa Municipal Tourism Office sa maong lungsod, ang nasangpit nga video kuha sa usa ka tour guide nga gikan sa IP Community nga si John Danda sa naasuy nga lugar.
Gipasa kini kaniya isip pruweba nga tinuod ang maong albino nga Philippine long-tailed Macaque.
Sagad kini masigpatan sa alas 6:00 sa buntag matag adlaw.
Madungog sa video nga gipa-atubang pa niini ang puting unggoy nga nagtongtong sa kahoy.
Anaa kini dool sa balay sa iyang igsoon sa maong lugar diin makita kini matag buntag.
Dili matud pa kini magpalayo sa tawo, gane duha ka dupa lang ang gelay-on niini kaniya.
Gipanawagan sa nagkuha sa video nga si John Danda ang katawhan nga nagduda, nga moadto sa maong lugar aron makita kini personal.
Sa karun, gilantaw na ang pagprotekta niini.
